Queste parole vogliono ricordare Fabio: sono con me da circa tre anni e giusto oggi, nel giorno del suo anniversario, ho deciso di condividerle con tutte le persone che gli volevano bene… Affinchè il nostro bene, si unisca e diventi ancora più forte. Sono scritte in bergamasco (o meglio ci ho provato) perché mi sembrava la lingua più schietta e vicina al mio sentire, ad un espressione che fosse più genuina e nostrana, rispetto a qualsiasi ambizione letteraria o artistica. Poiché potrebbe essere difficile comprendermi è possibile leggere il testo con la “traduzione” in italiano: lo trovate qui.

A gh’ό prope piassér de ‘ndàl a troà e salüdàl anche perché ai m’à dicc che l’istà mia tat bé da öna quac tep a chesta banda. Al ma pians in po ‘l cor al penser perché poerí, a ragiunaga be, à l’è mia stacc prope issè fürtünàt: a l’è nassìt con d’ ü probléma che sό gna come l’ sa ciama e la so mama a l’è ulada viá trop prest… Ma sό anche che l’è sèmper istàcc ü brào scèt e che mai e po’ mai al ghera só la pipa. Piӧ brào de tace d’όter che magare i zӧga al balù come ol Stronberg o che i va in gir col Mercedes o che magare i fà i sbròfa o i càncher o che ai sa compόrta come i professùr o come ol padrù de la Maresana o i tira in pé ü gioedé töcc i dé de !a setimana. A cönta mia sö méla bale, me! Sé, sé. Ol Fabio a l’è semper stacc brao e per me a l’è issé normàl, che ghe mia bisogn de tirala longa. A l’è normal, come a l’ê normal che a toi dú – me e lú – gh’è sèmper piasìt i fόmne…Sèmper! Domandega de la Manu, chela che la laoraa con noter: an vet chel che al va a cunta sö! E po’ in parrocchia, a lá semper fach ergot: al CRE al fasia l’animatore, ala mèsa fasia ol ciareghet e ai funerai al portaa la crus. E se ta olet es segur e se ta sa fidet mia de me, domandéga a i όter che rassa de òm che l’è! A scomete la aca in de stala che töcc ai tel digherà: “Pòta, ol Fabietto a l’è pròpe fόrt!”. Che pò, a pensaga be, “Fabietto Fabietto” l’è mia tat “…etto”! A l’ gh’à sinquant’ agn chèl sacranùnch e a lê pö grant e gros.
Prima de andà a troàl – i l’à portat in d’ü laùr in Bόrg Palàss, lé in banda indό gh’éra i macc, ai ma dicc – gh’ére peró òia de ‘ndà a fà ü gir in Sitá Ólta. Issé sό ‘ndàcc sö de corsa: l’è sèmper issé bèla co i sò stradine e i sò palàss, per mia parlà de quando ta rìet fò in Piassa Ègia o te rìet lé aprӧf ai Müre, quando ta èdet zό tӧta la bergamasca e piö in sö amò. Al ma pias sèmper indàga prima de ‘ndà a l’èstero o se gh’ό de ‘ncontrà ergü, perché a pense che in sta manéra in d’i me ӧcc ma rèsta öna someànsa de chèl che ό ést. Issé ma sa porte in giro la mé Sità Ólta. E i όter ch’i me arda, i vèd mia dόma mé, la mé bröta ghégna, ma pò a’ impό de Bèrghem e dí bergamàsch.
A chesta manerà ere pö resulvit öl problema che ghè semper quando t’andet a troà ü al sanatòre: ta set mai chèll che ta podet portaga det… Perchè se ta ga portet öna piantina ai sa lömenta iinfermiere, se ta ga portet i biscötch ai sa lömenta i dutur, se ta ga portet öna butiglia de barbera sa lömenta i paretch… E se ta portet negöt ta sa sentet ü respurchí! Al Fabietto, però ala fí, ghè andacià amó piö bè perché a go portato mia adoma la cartulina de Sità Ólta indè me och ma pö dò castagne gengia: ta ghet presente chèle börole gröse? E tal sèt perché a ghè iò portade? Proa a pensaga e induinà? Se ta g’ariet mia dopo a tal dighe me…

Apena ariat aó pensat che la strutura indoe a l’è il Fabietto a l’è prope bela… Ghè ü bel parc con dele bele piante e po i caseggiati ai gà öna forma storica quase egià, ma de det a l’è töt ristruturat: andà a saì, se ià fatch po a lur i ristrutturasiù al centdes? A go salit i scale e po’ so andatch innante in del curidur. Sölà destra ai ghera i finistrù, söla sinistra ‘n po’ de scafai con in po’ de liber: ma so fermat ad ardaga ‘n po’, perchè me a sö proprie curius e perchè basta ardaga ai titoi di liber per andà a fas öna idea de chi ghe sta de drè, del sò padrù. Le a prof, dopo, ò troat anche ü liber, con sö scritch un po’ de righe a ma: a me sö metit lè a lesele e sfuià qi foi lè. Al someaa ü di chi diare che ta troet pö in di rifugi ö soi montagne, indoe ta scriet so’ i to penser e riflessìu. A ghe n’era tante bele, nè, ma öna a l’era più bela te tote iotre a l’a disia isè: “Sei salito in cielo tra gli angeli sull’arcobaleno. Ti amo”. Al ghera pö a la data, gha mancaa doma la firma e al sö post gherà u disegn con dü cör ‘ndoe i linee ai sa seraa fo con ol simbolo de l’infinito. Tal set che so restat lè in po’ ad ardaga e che al me mancaa ol fiat?
Quando a ma sö desdat fo’ o pensat a chel che ai mera ditch: la so camera a l’è in fonta söla sinistra. Issé so andach sobet innante e s’eré drè a pensà a dit cos’è, quando dö infermier che i tiraa dre ol carelì ai mà superat! Mè, s’ere dre a caminà ala svelta come una Guzzi per intedes, perchè ere perdit in po’ de tep ad ardà in giro ma chele dö sciure lè, estide de bianc, che al someaa dü fomne su un Ape Piaggio, a mè l’à petada: aiè entrade de det prima de mé e dopo ai s’è girade ai ma fatch u sorriso e i ma dich in italiano: “Questo è il momento della sistemazione” e ai s’è tirade de dre la porta… E me so restat l’è de fö come u loc!
Va beh, so restat l’è in del curidur… A ghere de fa cos’è, se mia aspetat? Ma sò apugiat alà finestra ed o’ cominciat ad ardam in giro, in del fratep però, gl’infermiere ai iera mia serat bè l’ös e issè a sentiie prope be chel che i disia i du done e pense de iga sentit perfino la us del Fabio senza capi per negot i sö parole. Come al solet m’ê egnit de dit: la tó us a l’è semper stada un pö strana, mia semper capiee, anche se ga metie tota l’atensiù possibile. Po’ a chè, a ma è de pensá, che s’ere me ol sterloch, anche perché ogne tat me pader o me mader a me la dicc: “Ta capeset prope negot!”.
“Adesso ti giriamo e ti mettiamo un po’ di crema sul culetto.” Porca bestia o’ pensat… Ma che trattamento de scior che al ga fa al Fabietto, infina la crema in chel post! E po’ ai seghetaa… “Se sei bello Fabio! Sei bello come il sole! Ti manca solo la cravatta!”.
L’è dè fo pensae che del bu, la to simpatia e la to manera d’è fa, aiè semper stac ol to umile segreto: anche quando an lauràà là insema, in chela azienda chimica, che me e te, an s’era i du bocia e an ghera de fà i laurà piò strani e fors’anche inutii. E se me ma sa lamentaee, te mai ona parola: a ma sa regorderò semper te e me, che an portaa in giro i muntù de carta de böta via per po andà a tritala: i maghi del trita carte! I campiú del mont del macero!
Al so mia quat tep a l’è pasat, ma ho intuit che de l’è a poc ai iavres finich. A ta sentie cuntala sò ale infermiere ed anche se capie mia tat be öl significato come ó dicc prima, a sa comprendia sobet che ta fasiet un’ po fatiga a parlá, come se al foes mia u laur semplice e facile… Ghe mia pasat tat che infatti ai ta ditch: “Non sei stato bravo Fabio, sei stato bravissimoooooo!”. Con vintequatermelacincento O. E quando a l’ò sentit, a ta dighe mia quat a s’ere contet ed urguglius per te, che ta s’eret statch issè brao!”
So’ andatch a prof de la porta ei do sciure aiè andache fo’ col so carelì e con gentileza ai ma ditch: “Prego”! Issè ho fatch un pas innante e te… E te??? E te ta seret zemo indormentat. Ma dighe me! Ta seret dest 10 seconch fa ed ades ta set drè zemo a ronfà! O’ söbet ardat a chela flebò che ta gheret tecat: ai gavrà mia sbagliat e metit det ol Verduzzo o lo sgnapeto al post del farmaco?
A so riat a pröf del letch, ò proat a ciamat, ma piano: perchè ghere oia de saludat, oter che, ma prima de tot ol rispetto e l’educaziu. E issè ma so metit dre ad ardat chi poch meter quadrach de stanza: öna stansa che a parlà per immagini, a l’è là stesa de chi iastronauti che de l’è a poc, ai sa meterà sö la strada per andà sö sö in aria, fra i stele… Ona stansa normal, i armadietch de dre, ol bagnetí e po chela mensola töta tennologica coi luci, coll’attacco per l’aria, col campanel. Ol tö lecì coi sponde col telecomando e chel oter armadiet picien, coi rode, coi casetì indoe töch ai met det la settimana enigmistica o i puzzle, piötost che dö Rossane, Galatine o Ambrosioli o öl magliunsì. Söl ripiano de sura gherà pugiat sö dò someanse, öna bela madunina e ergot doter…
E pö sò turnat ad arda te coi to bei befetì (che ades a porte po’ a me e che ma fa someà al Gatto Silvestro) che ai fà ön po sofistec e scior, anche se a fin de la fera, sia mè che té an sè du bonaciù, de chei che l’è facile tirai e ciapà in giro. E visto che ta seghetaet a durmì o’ comunsat a parlat in po’ col pensiero, a parlà di memorie, de l’öltima olta che to est a la pizzeria e che an sera sentat zo mia tat luntà. E quando a seré piö cosa fà to fach ü per de carrese sura la coerta indoe ai ghera i tö pestì, fina a dit ciao.
Ma ü ciao bel, quater letere ma dicie prope bè, perchè pota, al so propementa mia quando al serà la prosima ölta che an sa ederà amò: a l’è issè strana la vita… U che al val, u che al ve ed anche se a m’al sà semper come ai và i laur, a l’è semper töt ü gran mistero. Per fortuna che an ga semper ergù, de che o de là, che i ga specià per fa la festa o per daga un abbraccio.
Ma so ultat e ma so metit drè ad andà de fo, s’ere zemó ala machina quando ò metich i ma in sacocia per tirà fo i ciaf… E induina chel che ho troat? Che sterloc… A ghere lè i tö castagne gengia. In del stes moment a ma so regordat po’, che ghere l’è in de machina, du mandarì e issê io’ ciapat sö po a chei, che ‘n po de vitamina C a là fa mai mal, no?
Issè so turnat indrè e te ho metit tot, söl taulì… Perchè tè, intat…Proa a induiná? A ta durmiet amò!
Prima ol mandarì…
Al so mia ol perchè però, onà olta pugiat m’è egnit de pensà alla Santa Lucia, ai laur semplici e sauritch, alà meraviglia che ognet tat ala ària per recordaga quat, malgrado tot, a l’è belà la eta. E prope tirando in bal la Santa Lucia a ma so recordat che ergu al mera ditch che ultimamente t’eret perdit po la ista, ma pusibel? A dir la verità a ma sa regorde che ta get semper portat iogiai però a so anche, che piò di otch, a l’è öl cör che al fa la diferensa, chel che te porta luntà e sò la giösta strada, chel che ta fa evitâ i casotch e i rebelot e i buse… E quindi anche se ta ga ediet piö, pasiensa, al gha penserà öl tö cor che oter che dieci decimi, a gha n’avrà almeno vintot.
E dopo ò pugiat sò, i dò castagne gengia.
In italiano ai
è ciamade castagne matte e iè chelè dell’ippocastano per intendes e ti ho portade perchè, al ma sa toch noter che an gherà i noni cuntadì: chele laure l’è, aiè mei de toch i farmaci de chesto mont! Oter che Bronchenolo o antibiotico o aerosol: dö gengia in sacocia, insema ad un po’ de riposo e la pappa reale di apine per colasiu, ü piat de macaru a mesde, u bel piat de minestrina la sira e ol latch con la grapa… E ta ederet che ta turnet sobet in furma!
A go mia ait ol coraggio de metele det in de sacocia di pantalù, anche perchè forse i pigiami ai ghale gnac, e anche perchè pènse che a l’è li stess, che al basta l’intensiù e ol penser. Penser che te ta gheret semper per me, con i tò messaggini sö uozzapp, la matina e la sira: messaggini che a es onest ai ma daa in po’ in pass anche perchè me a sò ‘n po un orso, ma che a ripensaga ades ai ma fa strens ol cor e i ma fa dit “grasie” e che sö stacc in po’ ü pelandrü perché a to respundit poche olte.
Ed anche se ga so mia ariat a parlat a chel punto l’è ò capit che l’era ol moment de andà: e to datch amò u sguardo… A l’è restada una sorta de quader: te, in del letch e de drè la finestra granda e bela che la daa soi piante. Ü quader de chei pisen, normali ma che al gà ü post particolare in de la mè personale pinacoteca. Oter che i quader de Accademia Carrara! Quance penser… Quance penser ai misteri de là età: ai mader chi mor quando i scietch aiè amò pisen, a chi al vè al mont sensa la benediziù de es e restà in salute, a chi a come mè, a l’è furtunat, al ga tot ma, fi che foi, al se lomenta semper e a l’è mai contet.
Onà olta de fò, a ma sö troat circudat de öna aria fresca e ü proföm strano, ol proöfum de l’autunno, de chesta stagiù che a fin del fera ala aria semper per fa marudà l’oa e per fa dientà gialde i bosc e per recordà che töt, ü de o l’oter al cambia. E che a forsa de cambiamet al riera ü bel de in doe al fenes e in del istes tep al ricomensa amò. E alura animo, perchè an sè che per ulis bê, per autas e tirá insema, töc insema, di bei ricordi. Ricordi che se i merita aiè mia come i foe, che i cioca mai in tera, ma che i resta semper tecach a noter: issê chi che ghè e i chi ghè mia o che al ghè piö, aiè toch legacc insema e i ta fa capí chel che al völl di del bu “famea”.
Tri de dopo
Doma ades ai mai ditch come al sa ciama, ol non giöst, de chel ospedal in doe ta so egnit a troat: hospice. Ai me l’à ditch incò, 10 de noember, quando ai mà ditch insema che ta set dientat un angelì. Ed anche se al so che i angelí ai è tòt bei, a go mia dobe nel dil: al so perfettamente che te, ta set u falì più bel di toch i oter.
Arda so Fabietto, arda so ai to amis e ala tò famea che ghe restat che, arda so insema ala to mama e al to papà… E zemo che ta ga set, visto che che si lè tocc insema, daga po ü basí – ü basí comulativo che al ria po dal me pare, dai sorele, cogntach, neut e paretch – a la me mama e ai me noni e ai me amis. E regurdis, töcc insema, de ardà so perché noter an ga na semper bisogn e perché che, ogne tat, a ma è de pensà, che iè drè a dientà tocc macc… E fi mia i scherss, neh, regurdis de ne noter, come noter as sa regorda semper de oter.
Dedicato a te Fabio “Fabietto” Zucchinali
18 febbraio 1973 – 10 novembre 2023











